【On.cc】《中年4》蒙面歌手搶先開騷　周志康劉佩玥獻聲回饋歌迷

《中年好聲音4》的「企鵝人」周志康、「獅子王」羅天宇、「貓女郎」劉佩玥、「白羊君」姚兵、「白眉鷹王」莫家淦、「樹熊公子」黃建東早前宣布將於9月30日假在麥花臣舉辦《愛爆動物音樂秀》。對於外界反應熱烈，優先預訂門票早已售罄，周志康表示非常開心：「因為經歷咗差唔多一年嘅比賽，途中有唔少fans問幾時會開show，終於可以畀個日期佢哋。見到我哋今次音樂會動物歌手嘅陣容，亦都令我諗番起當初大家參加呢個比賽嘅第一日，大家戰戰兢兢好畀心機去練歌，各自為自己嘅舞台努力。今次大家可以再為屬於大家嘅音樂會共同努力，有另一種意義，加上其他5位都係自己嘅好朋友，所以好期待今次音樂會。我希望唱多啲好歌畀大家聽，回饋返呢段時間一直支持我嘅歌迷。」

《中年好聲音4》一班蒙面動物歌手合體開騷。

積極排練。

劉佩玥亦感謝大家一直以來對她的支持和鼓勵，「好感恩由大家喺我參演嘅劇集角色中認識我，到今次可以喺《中聲4》嘅舞台上再發現我唔同嘅一面。雖然比賽已經結束，但因為我好熱愛音樂，好鍾意唱歌，所以一直都繼續好努力咁去練歌同練琴，亦有學習音樂創作，當然唔少得一直要keep住身心嘅健康狀態、做運動冇得臨急抱佛腳，要好自律同持之以恒，所以依家都keep住鍛煉自己，唔單止為咗上台表演着衫好睇，而係將好嘅狀態一直keep住，咁就做咩都會更得心應手。」

羅天宇好開心有一個屬於他們動物歌手的機會，「其實係參加比賽嘅過程中，我哋基本上係冇以一個組合形式去代表動物歌手唱歌，所以真係好期待可以一齊大合唱。另外如果唔係公司畀咗我哋參加《中聲4》嘅機會，我相信自己都冇機會可以成為呢個音樂會嘅其中一分子，再加上自己喺24強止步，一直都希望可以有更多機會再去唱歌畀大家聽，所以自己好珍惜嚟緊係音樂會所參與嘅每一部分。」由於距離《愛爆動物音樂秀》尚餘個多月時間就要舉行，6位歌手異口同聲說寧願犧牲睡眠時間，也要把今次演出做到最好。

劉佩玥多謝粉絲支持。

羅天宇一直期待「動物歌手」大合唱。

周志康期待今次演出。