#高海宁[超话]# 【东网】高海宁无暇谈情　遇啱即结婚

无线花旦@高海寧 （高Ling）事业稳步上扬，惟曾因身材出众而被定义为「唔系好女仔」，令她一度沮丧，如今终于看开，专注工作冀望对得起支持者。虽然近年在爱情上交白卷，但她庆幸从未遇上渣男，全因一直铭记家训「带眼识人」，她扬言不追求刹那激情，只在乎长久关系，若爱情来了，不排除成为人妻！

高海宁在现时热播无线剧集《夫妻的博弈》中，角色命途多舛，惨被老公及闺密双重出卖，更经历癌症及撞车，其后获得重生机会而改写命运。剧中经历坎坷，幸而高Ling现实中从未遇人不淑，她说：「所有以前嘅男友喺相处过程中都好锡我，冇人系渣男。（冇遇过第三者？）我还好，希望将来都唔会遇到。（拣男友眼光唔错？）主要系我拍拖次数唔多，只系得两个。」她指从小听从爸爸所教「听其言不如观其行」，会花长时间了解对方，不相信一见锺情：「所谓一见锺情只系好感，但唔足以令我因为咁而好爱佢。我唔系恋爱脑，好理智，好锺意分析，我睇好多心理学嘅书。」跟拣男友一样，高Ling交友同样挑剔，要闯入其内心世界并非易事，直言好朋友10只手指数得晒。

纵然未曾被身边亲友背叛，高Ling却对剧中角色被贬低及轻视的遭遇感同身受：「有段时间比较难过，觉得自己不被理解，无论我点努力，大家只系集中喺靓、花瓶同身材上面，例如我嘅恋爱经历唔多，但有人会觉得我唔系几好嘅女仔，咁唔止系质疑我嘅人格，亦系质疑我屋企嘅家教，我嘅家庭教育系几好，价值观同待人处事都系来自我嘅家庭，当大家对我有呢个质疑，我会几唔开心。（点解对你有误解？）身材好同性感嘅女仔就会畀人觉得唔好，呢个系刻板印象。」她称现时已看开，与其聚焦在负评上，倒不如将焦点放在欣赏自己的人身上。

视佘诗曼为目标
高Ling靠实力成功撕下「花瓶」标签，2023年凭剧集《新闻女王》「许诗晴」一角拿下「最佳女配角」奖，演技获认可，更凭此人气角色孭飞之后开拍的新剧《新闻官许诗晴》。明年踏入4字头的她，被问到下一步是否剑指视后？她坦言害怕期待落空，因此从不执着于奖项：「依家接每个作品，只会谂点样演好个角色，对得住我攞过嘅奖，唔好退步。」同时视佘诗曼为目标：「希望好似佢咁，凝聚到一班人为剧集努力，好有个人魅力。佢真系好努力，为咗令大家投入啲，会事先同大家倾偈，记住每个人嘅名，做好情感上嘅连系，唔止系顾住自己嘅角色，而系整场戏同所有演员。」谈到近年不少艺人离巢无綫外闯，高Ling不讳言曾萌生「退圈」的念头：「有计划过去读书，我对心理学好感兴趣，亦觉得自己有共情能力，我经历过情绪困扰，又走到出嚟，所以好希望帮到人。」

相比事业，高Ling的感情生活显得乏善可陈，她表示认识一个人需要很长时间，但正处于事业上升期的她，偏偏最缺时间：「有朋友话要介绍男仔畀我，我叫佢唔好住，迟啲先，等我冇咁忙嘅时候。我真系好忙，而且个脑长期都系记工作，冇时间去思考同感受其他。（你永远都冇时间！）又或者咁讲，我好信Timing，遇到就遇到。（距离上次分手至今有冇拍过拖？）有认识过人，但最后唔啱。」讲到择偶条件，她渴望稳定的关系，不喜欢暧昧拉扯：「激情只系一瞬间，希望大家嘅价值观相同，可以分享各自内心，先可以细水长流。（会唔会喺事业高峰期结婚？）唔知㗎，可能会！」