【娛樂新聞】TVB與紅果短劇合作拍豎屏劇 《金枝慾孽之宮牆折柳》橫店開機 陳豪再演孔武掀回憶殺

無綫集團（TVB）今日（16日）宣佈與內地大型短劇平台「紅果短劇」達成合作，正式踩入豎屏劇（直度短劇）賽道。雙方首部聯合打造嘅重頭劇、經典神劇《金枝慾孽》番外篇《金枝慾孽之宮牆折柳》，今日於橫店明清宮苑舉行盛大開機儀式。

開機儀式上，劇組特別安排播放經典配樂《詠嘆調》，瞬間喚起全場回憶。視帝陳豪時隔多年再次穿上清裝，以經典角色「孔武」身份現身，成功掀起全場「回憶殺」。他笑言：「隔了這麼多年再做孔武，感覺好熟悉，但今次拍豎屏劇嘅節奏同演繹方式好新鮮，對我來講也是一個新挑戰。」

除咗陳豪，同場仲有陳自瑤（飾皇后）、龔嘉欣（飾靜貴妃）、鄭子誠（飾皇帝）等實力派坐鎮，並誠邀內地短劇人氣演員趙夕汐（飾慕之）及TVB實力新星阮浩棕（飾惠親王）擔正男女主角，再聯同新生代演員倪嘉雯（飾子如），幾位新一代好戲之人首度聯手，令人期待。

今次合作標誌著TVB破天荒將神級IP搬上豎屏劇舞台，將標誌性嘅精良製作與新媒體嘅快節奏無縫結合，積極開拓年輕市場。對於今次強強聯手，TVB戲劇部助理總監文偉鴻表示充滿期待。他指出，豎屏劇嘅節奏要求極高，與他一貫追求緊湊戲劇張力嘅風格不謀而合：「今次同紅果合作，對TVB戲劇組來講絕對是一個突破。雖然變為豎屏、篇幅縮短，但製作團隊完全動用拍攝傳統重頭大劇嘅嚴謹規格去處理。我們希望透過今次《金枝慾孽之宮牆折柳》，向觀眾證明TVB不單止能拍好傳統長劇，在精品微短劇賽道上，一樣可以憑藉紮實嘅劇本同精良嘅製作突圍而出，帶給大家『拳拳到肉』嘅全新視覺衝擊。」

#TVB[超话]#