藝人莊思明與關嘉敏3年前合作拍劇後成閨密，彼此同哭同笑同拯救毛孩，沿路牽手經歷令感情昇華如家人，兩人表示若有機會再合作拍劇，想嘗試對敵。在嘉敏眼裏，「富二代」思明性格節儉，名副其實是「莊精明」。談到思明下月出嫁，嘉敏替「摯愛」覓得如意郎君感高興，且準備了神秘賀禮衷心送上無限祝福。

「異姓姊妹」莊思明與關嘉敏年前於無綫劇《巾幗梟雄之懸崖》內齊齊扮演胡定欣助手，留守外景地橫店「朝夕相對」逾兩個月，感情因此慢慢升溫。對於外界經常認定思明「富家女」形象，嘉敏急忙為對方更正：「就算佢係有錢女，都係不一樣嘅有錢女，我最欣賞係佢精明嘅眼光，其實佢好鍾意格價，我手機所有嘅慳錢Apps，都係佢教我Download嘅，呢種係福德。其實佢應該叫『莊精明』，我就係『慳家敏』，楊明搵到咁嘅另一半，真係執到嘞！」

兩人經常剖開心扉互訴心事，不時爆喊收場，更試過盡訴心中情至翌日清晨時分，彼此有說不完的話題。最令嘉敏意想不到的，是思明一路走來不易：「有時佢講佢嘅遭遇，喊嗰個係我，佢就語帶輕鬆，好似講緊其他人咁，搞到我好想畀個擁抱佢。佢好願意同我分享自己嘅人生經驗，好似大姐姐咁睇住我。」思明聞言感慨補充：「其實年紀愈大，我嘅情緒愈唔會好大波動，忍唔到要匿埋喊嘅情況，真係好耐冇發生。依家經歷愈嚟愈多，望番轉頭好多嘢都微不足道，只有生老病死先觸動到我！」

思明眼中的嘉敏是個很好學的女生：「佢好勤力，真係唔使瞓咁！好記得當年喺橫店，開工之餘佢話要減肥，寧願犧牲休息時間都要落街跳繩，仲要係話做就做。近期佢迷上肚皮舞，真係搵樣嘢畀自己學喎，老師叫佢參加比賽就去，換轉我唔會無端端搵嘢學，就算學咗都唔會比賽，冇呢個勇氣呀！」原來思明有嘗試幫嘉敏物色另一半，只是深知對方擇偶以感覺行先，大葵扇很難撥得成功，惟有寄語：「希望佢搵到啦！」

3年多的友情從未爭吵斷聯，兩位愛狗之人反而試過聯手「救命」，當時情景至今仍歷歷在目：「喺橫店時喺街邊救狗，好驚啲狗仔會死，我哋認識咗個寵物店老闆，一齊聯手救嘅，好彩最終都冇事，但我哋發現個老闆其實覺得我哋做嘅嘢有啲多餘，因為嗰度環境好多（狗）都係咁，我哋又可以救得幾多隻吖？」

談到相交以來的難忘事，嘉敏表示特別多，但印象最深刻是體驗思明的酒品：「佢酒後從來唔會發癲，有次同佢去食飯，原本酒量幾好嘅佢因為太開心飲多咗，我抬佢返房嘅時候，有位男生想入嚟拎少少嘢，點知搵極都搵唔到，佢竟然喺洗手間衝出嚟想幫手搵，搞到個男人有啲尷尬，主動話遲啲先嚟拎。」

思明與嘉敏希望未來的日子能夠繼續攜手走過高山低谷，起碼能夾到時間去一次閨密旅行，下月初思明於馬來西亞結婚，相信便是最好時機。嘉敏笑說：「我咁大個女都未去過馬來西亞，好想跟思明去佢鄉下見識吓，希望到時留幾日玩番吓。一直講咗好耐想一齊去旅行，但點都撞唔啱，好似舊年我大部分時間忙緊拍《女神配對計劃》，所有朋友都見少咗，好彩請咗思明陪我做閨密團拍攝咋。」嘉敏又指已準備了一份自己認為十分適合的賀禮到時送給一對新人。提到日後倘若有機會二搭拍劇，兩人異口同聲表示想嘗試對敵：「因為現實生活中相信我哋體驗唔到嘞，哈哈！」