【On.cc】林峯4部電影排住拍　嘆《城寨》拍到周身傷

藝人林峯今日（4日）以全球代言人身份，出席「美心中秋限定店」開幕活動，主持亮燈儀式，吸引大批粉絲到場支持。林峯更即場進行盲測挑戰，憑味蕾辨識三款美心月餅口味，又親手製作專屬「月餅 Key Cap」解壓神器，跟現場觀眾互動，讓全場High爆。

林峯受訪時表示中秋節正日要開工，透露緊接《九龍城寨之終章》後仍有幾部新片要開工，他説：「開心嘅， Keep住有嘢做，預計要做到農曆新年之後，有3、4部電影，嚟緊係套賀歲片，今次輕鬆少少唔使周身傷，哈哈！」他指今次拍《終章》受傷程度比自己想像中還好，笑稱是「有驚無險」，很期待作品出來的效果，問到上次拍《九龍城寨之圍城》跟今次《終章》比較，那一部拍得比較辛苦？他説：「我哋4子有傾過，我自己覺得第一部辛苦啲，一直畀人打，今次加入咗好多新角色分擔咗，不過打嘅難度亦都高咗，我哋邊拍邊訓練，《城寨》賣點係打得甘嘛！」他透露今次拍攝自己手腳也受傷，但認為動作片受傷是無可避免，直言5個月內完成《終章》拍攝絕對是一項創舉，現時腳還有點傷，指太太張馨月見他周身傷也有關心，他則跟太太解釋這是《城寨》的特色：「佢帶我食好嘢，我易肥易瘦，依家要Keep番弗。」

林峯中秋節正日要開工。

林峯笑言《終章》多新角色，等佢戲中唔使畀人打咁多。

林峯透露除了為電影開工，還有5個城市的巡唱會舉行，問他可有時間陪家人？他表示每逢有空檔便會趕回家陪家人：「依家每日都會送個女返學，見到佢學校設施咁正，我自己都想返學。」他指6歲女兒「小格格」很黏他，不過也很懂事，雖然不捨爸爸但會忍住不讓爸爸看到。

另外，提到老闆古天樂及天下一電影製作有限公司，日前被一間離岸公司入稟追討1.49億港元欠款，林峯坦言剛由內地回港未及了解事件，加上事件已進入司法程序故不便多談，他説：「總之我哋支持老闆！」

林峯話今次手腳都有受傷，但問題不大。

林峯封口唔講古天樂官非。