洪嘉豪新歌出「雜誌」搞搞新意思 朝早4點起身同院友一齊體驗撲書
.
洪嘉豪推出全新單曲《穿波鞋的惡魔》，不過今次唔係就咁出歌咁簡單，而係搞咗本限量雜誌《KIKI》創刊號！噚晚已經有約百位「院友」（粉絲暱稱）喺啟德通宵排隊，搞到Kaho都有啲心痛，但無奈雜誌只限售1500本，每人限買一本，佢話：「希望大家接受呢個創新嘅宣傳方法啦！」

Kaho解釋今次點解要用雜誌形式出歌：「其實呢幾年一直都做音樂做碟，好多時都係做完歌，然後出個產品大家去買。但我諗可唔可以有啲創新嘅想法呢？我始終都係Gen Z嚟㗎嘛，鍾意好玩、有創意嘅嘢。」佢透露呢本《KIKI》其實就係一隻碟，因為每出一首歌就會出一本雜誌，儲齊五本、六本就會得到一個完整版嘅專輯，「最終期應該會擺隻碟落去，但點樣呈現仲諗緊，因為雜誌送碟嗰啲我哋細個都經歷過，想玩返呢樣嘢。」

為咗同院友一齊體驗撲書嘅滋味，Kaho話今朝4點就起身，專登出到去深水埗福榮街某便利店買書。點解揀福榮街？佢笑言：「因為我同事話有個『福』字，應該好有福氣！所以咪去嗰度囉。」佢仲自爆係同經理人、髮型師等五個人一齊去，親力親為試吓係咪真係咁難買。「我覺得有策略、有運氣就買到，今次係一個好好嘅體驗。」佢更揚言今年每一次出新一期，都會咁樣早起身去撲書，「我承諾咗大家㗎！」

講到打擊排隊黨，Kaho話今次有40幾間唔同分店同時發售，已經係一個好大嘅防禦，「始終40幾間都要有排隊黨先做到件事，我哋成個行業都好盡力去做，但冇辦法，始終好難杜絕。所有歌手都唔想有呢啲事發生，演唱會飛都係，但我哋能力係咪真係做到杜絕？盡力啦。」佢仲呼籲院友盡量自律每人買一本，「我明白可能會幫朋友買，但盡量啦，對大家都機會大啲。」

早前Koho搞咗兩場BBQ同粉絲見面，用優惠入場費邀請約千名粉絲參與。佢話自己全程冇燒過嘢食，「我真係冇燒過，因為我要同每台傾偈、抽獎、玩Bingo，又要影大合照，根本冇時間。但好開心，第一日落大雨都無阻我哋嘅愛，第二日個地爛晒，啲鞋好恐怖！」佢希望每年都可以搞一次，下次想時間長啲，等大家可以真正享受吓。

【MV孭女主角跑街 跑到氣喘腳震】
講到新歌MV，Kaho話孭住女主角跑咗七至十轉，跑到氣喘，「其實最慘係女主角，因為我背咗佢幾次之後，佢先話我知佢腳帶受咗傷，所以佢先最痛。」佢笑言自己雖然冇做健身，但係「強健體育伯」加上職業足球員，體力上唔擔心，但都認跑完之後肌肉痛咗幾日。
佢仲爆MV有個彩蛋，「大家細心留意，最後有個背影鏡頭，其實我已經開始急步、跌步，因為女主角腳痛想快啲搞掂，見到我有少少腳震㗎，大家自己發掘吓！」

講到老友陳蕾憑《普通人》再入圍金像獎原創電影歌曲，Kaho話：「恭喜晒！我希望除咗恭喜佢，嚟緊有多啲唔同嘅電影搵我唱返首歌，等我都可以入選吓！」 http://t.cn/AXfV8ail