「任憑你波衫再好睇，踢唔到決賽週都係徒勞…」

近日就有好多意大利名宿都有發表唔同嘅睇法，其中前意大利國家隊中堅阿布隆尼表示冼拿喺網球壇有好好嘅成績，安東尼利喺F1表現都唔錯，男女子排球都有戰績，滑雪運動亦都帶嚟刺激，呢啲運動都一定程度上取代咗足球，為咗重新激發意大利年青人對足球嘅熱情，意大利國家隊需要重返世界盃，其他體育運動都有成績，意大利足球真係特別要加把勁。

結果？！瑞士、北馬其頓，然後到波斯尼亞。一次可以解釋係意外；兩次就證明咗係有問題；咁三次同兩次，其實個分別已經無咁大。而家只能再等四年，應該係至少再等四年…

恭喜波斯尼亞，歷來第二次晉身世界盃決賽週！連續兩場互射十二碼淘汰對手，韌力同耐力都值得稱讚；40歲嘅前鋒迪施高亦都絕對值得再一次參與世界盃決賽週。

與上一仗2-0 擊敗北愛爾蘭相比，今場東拿利明顯跌watt唔少；相反同居中場嘅文奴爾盧卡迪利表現就好好多。唐納勞瑪表現相對稱職，但被追和嘅入波都係來自於佢嘅長傳球落點欠佳被攔截反擊所致。喺領先一球繼而有巴斯東尼紅牌被逐，再輸埋十二碼，意大利怨人無尤。加圖素用人上確實「精英盡出」，但缺少嘅係化學作用，迪馬高冇得同巴斯東尼「挨著上」功力減半，後者要踢正中堅明顯亦難以適應；普列坦奴無任何建樹，令人想念狀態火熱嘅薩柏哥斯達何以未有入選。🤷🇮🇹⛔️

篇幅或者過長，但確實係心聲。不過傷心嘅又何止意大利，波蘭不敵瑞典、丹麥被捷克淘汰，唔少「老將」可能係足球生涯最後一次踢決賽週嘅夢想都幻滅，特別對於波蘭嘅利雲杜斯基（37歲）來講… 捷克同樣展現出極強嘅韌性，準決賽十二碼擊敗愛爾蘭，決賽又喺十二碼決勝贏埋丹麥。如無意外，34歲嘅艾歷臣都好大機會最後一次參與（世界盃QF）。

恭喜曬土耳其、瑞典、波斯尼亞同埋捷克🎉

2026世界盃歐洲區附加賽分組賽決賽賽事賽果-
科索沃🇽🇰0-1 🇹🇷土耳其
瑞典🇸🇪3-2 🇵🇱波蘭
波斯尼亞🇧🇦1-1（pen：4-1）🇮🇹意大利
捷克🇨🇿1-1（pen：3-1）🇩🇰丹麥

#FIFA World Cup qualification (UEFA)##世界盃QF歐洲區附加賽##FIFA# 🌍⚽️🇺🇸🇨🇦🇲🇽