梁朝偉相隔18年再赴韓谷新片 講韓文派愛心手勢冧粉絲
.
國際級影帝梁朝偉首度擔正歐洲電影《Silent Friend》，將於4月15日喺韓國上映。舊年9月佢先喺釜山國際電影節亮相，噚日（4月2日）再度飛去韓國，展開三日宣傳之旅。對上一次佢為《赤壁》去韓國造勢，已經係18年前嘅事。

梁朝偉同導演伊爾蒂蔻·恩伊迪（Enyedi Ildiko）噚日下午抵達首爾後，即刻趕去戲院同影迷見面，全場觀眾歡呼拍掌，氣氛熱烈。偉仔露出溫暖笑容，用韓文同粉絲打招呼：「好開心再次嚟到首爾見大家。好耐冇嚟，希望以後多啲機會訪韓。」佢問觀眾鍾唔鍾意套戲，全場齊聲大嗌：「好正！」偉仔努力同大家互動，仲大方分享好多幕後花絮。

之後導演分享拍攝故事時，企喺旁邊嘅梁朝偉瞬間展現「I人」本色，雙手唔知放邊好，惟有摸吓褲袋，不斷向觀眾揮手點頭，尷尬之餘仲伸咗吓脷，呢個侷促樣俾網民大讚可愛。佢透露為咗套戲落咗唔少苦功：「準備期間我讀咗好多書，包括神經科學、植物學、哲學，仲有一本講我哋點樣同地球上所有生物、甚至AI共存嘅書。」佢希望觀眾唔單止享受電影，仲可以從中得到啟發。活動尾聲，佢「入鄉隨俗」跟住主持人用手指比出心形手勢，網民笑稱：「梁朝偉嚟到韓國都走唔甩要比心」、「逐漸變成比心老手」。