林智樂靠想像力演繹不同情緒 承諾有機會將獻唱新歌其餘版本
---
林智樂Felix 以一身暗黑造型，為新歌《The Red Button》拍MV，當初呢首歌嘅歌詞有幾個版本，而最終修訂版，對Felix嚟講獻唱時都有一定難度。

記者： Felix，今次新歌《The Red Button》嘅MV，聽講你收到幾個唔同版本嘅歌詞同劇本？
林智樂： 當初我哋收到《The Red Button》呢首歌嘅幾個版本，最後揀出嚟拍MV嗰個版本，對我嚟講絕對係一個好大嘅挑戰。我哋覺得想要一啲更強烈嘅情緒，好似有啲流動嘅感覺咁，所以最後決定演繹四個唔同嘅自己。雖然都係同一個角色，但難度在於要兼顧四、五個唔同嘅造型同演繹方法，好彩我哋嘅團隊好勁，最後都成功捕捉到呢四種情緒。

記者： 喺MV入面要演繹多種情緒，對你嚟講演技上係咪學咗好多嘢？
林智樂： 係呀，我事前做咗好多準備，睇咗好多電影資料片，真係好投入去了解角色。後尾發現，當你有好多層次嘅時候，唔同人嘅演繹方法都會好唔同，要將場景同當下嘅情緒匹配起嚟。我覺得自己好容易受身邊環境影響，所以需要一啲外在嘅感官刺激，先可以去到更高嘅強度。

記者： 今次新歌嘅班底好似好強勁，係咪你一直想合作嘅對象？
林智樂： 係呀，Felix今次係同我一直夢想想合作嘅人一齊做嘢。我一直好想同馮穎琪同小克合作，今次終於夢想成真，我好開心。我聽過小克老師嘅風格，佢係我一路想合作嘅人，佢好忙，但當我知道有機會嘅時候，件事好快就成事咗。

記者： 聽講小克寫咗幾個版本嘅歌詞？
林智樂： 其實成個過程入面有幾個版本嘅歌詞，雖然正式出街嘅得一個，但我希望大家將來有機會睇到唔同版本。或者喺現場表演嘅時候，可能會唱其他版本畀大家聽。

#TVB[超话]# http://t.cn/AXInQ17A