《正義女神》陳煒大讚劉倬昕演奸夠入肉 與佘詩曼法庭鬥戲大呼過癮
.
TVB新劇《正義女神》將於明晚登陸翡翠台首播，今日劇組舉行宣傳活動，主演陳煒以及反串飾演陳煒兒子的劉倬昕一同現身造勢，二人接受訪問時大談拍攝點滴，劉倬昕更分享了演繹陰森反派的心路歷程。

記者：煒哥，今次同劉倬昕合作飾演兩母子，你覺得佢今次嘅演出表現如何？
陳煒：佢真係做得好好，超級畀心機去演呢個奸角！其實拍攝嘅時候，佢不時都會欠缺信心，成日問自己咁樣做得唔得，所以我都俾咗好多信心佢，同佢講「你放心去演就得啦，你都經過咁多訓練，加上排戲嘅時候監制都俾咗好多指導你」。我哋事前溝通咗好多，佢真係交足貨。尤其係剪輯完出嚟之後，效果仲更誇張，我睇完都話「我呢個仔奸到出汁，點解可以咁壞㗎」，真係一個比我想象中更大嘅意外收穫。

記者：劇集聽日就首播啦，而家心情如何？會唔會約埋老公一齊睇首播？
陳煒：我約咗觀眾朋友一齊睇呀！其實內地播映期間我一路都有留意反響，見到大家好受落、好鍾意呢個題材，尤其係呢個角色憑住出色演技，已經帶出咗好多話題，所以我自己都好有信心。至於話佢係我個仔，佢咁大個，我生佢都绰绰有余啦，我哋兩母子都keep得好好嘛，佢廿幾歲人，演十四歲嘅角色都毫無違和感㗎。

記者：今次都係你第一次同佘詩曼有咁多對手戲，拍攝過程有咩感受？
陳煒：係呀，今次真係第一次正式同阿佘交流合作，以前連傾計都冇幾句㗎。尤其係拍法庭戲嘅時候，我哋一齊完成咗成百幾頁嘅對白，真係拍得好爽！我哋你一言我一語咁唇槍舌劍、互相鬥戲，比起宮鬥戲仲要刺激、仲好睇得多！

記者：問返阿昕，今次演呢個咁陰森嘅反派角色，拍攝嘅時候會唔會好難抽離？有冇用咩特別方法代入角色？
劉倬昕：冇錯，我俾自己用呢種沉浸式方法演，其實我都知道有少少危險，但係我當然唔會做違法嘅事啦。喺拍攝嗰段時間入面，我就逼自己要陰沉啲，儘量唔好同大家玩得太開心，就連我身邊嘅朋友都問我「做咩呀？最近唔開心咩？」，但其實唔係，我只係想進入個角色，儘量keep住個狀態。就算拍完出街、返到屋企，我都會繼續研究劇本，所以都想keep住個狀態去揣摩角色。

記者：之前聽講你讀犯罪學，呢個專業背景對你演呢個角色有冇幫助？
劉倬昕：絕對有幫助！其實拍呢套劇嘅時候，我啱啱先參加完畢業禮，我都會將讀書時候學到嘅理論，應用喺研究劇本、揣摩角色上面。例如有個叫「犯罪三角形」嘅理論，係話當有一個合適嘅目標、一個有動機嘅人，再加一個欠缺監護人嘅狀態，呢幾個因素加埋一齊，就會有產生罪案嘅可能性。我覺得今次呢個角色都幾符合呢啲理論，所以呢樣嘢真係幫助我好多，等我可以更好咁做好呢個角色。

記者：咁你具體係點樣令自己保持陰沉狀態㗎？本身性格係咪都比較內向？
劉倬昕：完全唔係呀，我本身係個笑点好低嘅人，咩事都可以笑一餐。所以要變得陰沉，首先就係由個樣做起，儘量唔好笑得太多，就算遇到好開心嘅事，我都會諗，呢個角色唔會有太活潑、太快樂嘅反應。尤其係拍法庭戲嗰啲重頭戲嘅時候，仲會更加收斂，少啲同其他演員玩得太開心，驚影響到自己入戲嘅狀態。

記者：之前有冇諗過呢個角色出街之後會咁受關注，掀起咁大話題？
劉倬昕：我完全估唔到，仲要一開始我好驚添。因為我知道香港以外嘅地方，有啲好類似嘅題材，入面都有定位相似嘅角色，所以我好擔心大家會拎嚟比較，加上呢個角色始終都比較偏向反派，我驚大家唔受落。不過而家都放心晒啦，好慶幸大家都好接納呢個角色，仲俾咗好多鼓勵我。仲有觀眾話，夜晚睇我呢個角色會發惡夢，社交媒體上面嘅網友仲話呢個角色係「TVB第三恐怖角色」，我睇到真係好有滿足感，因為證明我真係做到咗大家睇到會覺得陰森嘅效果。

記者：咁之後有冇話想繼續挑戰呢類型嘅反派角色？對之後嘅演藝路有咩期待？
劉倬昕：呢個類型嘅角色我覺得都ok嘅，其實古裝劇我都想挑戰下，之後都會繼續畀心機加油，當然唔會真係代入角色誤入歧途㗎。
#TVB[超话]# http://t.cn/AXIqNEQn